A dorna Fuxe, ganhadora da X Regata Porto Meloxo!

Nunha tardinha agradábel, con ventinho do noroeste durante toda a tarde, xuntámonos 17 dornas na area de Porto Meloxo.

Aparelhadas antes da saída.

O percorrido, máis ou menos o de sempre: saír do porto, deixar o Faro das Pedras por couso, vir a terra pola Mexilhoeira e volta a Moreiras. Así dúas voltas 🙂

A saída, como é habitual, foi bonita e divertida. Uns optaron por boghar até ben saídos da praia, outras subiron vela tan pronto puderon e alghún non lhe daba vento a montar o temón…

 

Publicado por Alberto Montenegro Rías Baixas em Domingo, 17 de Setembro de 2017

Saír do porto non foi tan fácil: o venho sopraba máis ben do oeste, así que houbo que facer como mínimo un par de bordos esquivando as pedras.

Caza escota!

Para chegar ao faro fixo falta (polo menos) unha boa bolina. A Fuxe e a Nécora xa destabacan na primeira volta. O vento continuaba do oeste rolando a norte, polo que pasado o faro xa se podía vir nun largo.

Na segunda volta o vento subiu un pouquinho, e quen bolinou ben entre as bateas pudo recuperar alghunha que outra posición. A Fuxe e a Nécora loitaban aí pola primeira posición. Pola cola, a Beliña e a Toxiña preferiron baixar a vela.

Na empopada final, Manolo e Brais Parada (Fuxe) chegaron primeiros, seguidos pola Nécora e pola Marijuana.

A Marijuana chegando á meta.

Os últimos metros foron moi competitivos para un grupinho de dornas que chegaba despois, e que loitaron até chegar á meta para non perder a posicións.

A Lara Doce e os xuizes ao axexo…

E a Chunga…

A cousa acabou así:

  1. Fuxe
  2. Nécora
  3. Marijuana
  4. Mimela
  5. Noelia
  6. Nova Froiña
  7. Lara Doce
  8. Cormorán de Ons
  9. Chunga
  10. Montañesa
  11. Maraxe
  12. Rosalía
  13. Calloa
  14. Funqueira
  15. Fanequeira
  • Toxiña
  • Beliña

E non nos esquecemos da Julicheira, a Sica e a Muller de Balboas, que non competiron mas que navegaron á vela polo campo de regatas 🙂

As (pen)últimas dornas chegando ao porto…

Para non perder as tradicións, a cuchipanda tamén foi boa: materia prima do primer mío, camisolas para as tripulacións e unhas fermosas acuarelas de Carlos Besada para o podium!

Parabéns campeóns!

Obrigados ao Bar O Porto, á Taberna Meloxeira, a todas as lanchas de apoio, e as todas as persoas que colaboraron antes, durante e despois da regata. Po ano máis!

Máis?

X Regata de dornas á vela Porto Meloxo

Sabiades que desde hai 10 anos se organiza a Regata de Porto Meloxo? Pois este sábado día 16 de setembro de 2017, con saída puntual (se non a marea…) ás 16hX Regata de dornas á vela Porto Meloxo!

Xa hai plan para este sábado!

Alí nos vemos dorneir@s!

Nin o furacán pudo coa Marijuana en Miami

Nin o furacán nin o resto das 15 dornas que se xuntaron este sábado na praia do Espinho de San Vicente puderon bater a Marijuana, que ganha novamente a “Regata de Dornas á Vela Camping Miami Playa“.

Os campeóns (repetidores) recolhendo o premio.

Antes de comezar, co bandulho aínda cheo xa viamos como o ventinho, do noroeste, non deixa de subir, así que patróns, patroas e outra tripulación ía botando as dornas ao mar mentres decidía se colher ou non algún ris… Ler mais

V Regata de Dornas á Vela “Camping Miami Playa”

Este sábado 9 de setembro con saída puntual ás 16h00 na praia do Espinho de San Vicente do Mar, V Premio-Regata de Dornas á Vela Camping Miami Playa, organizada por este camping coa colaboración (entre outros) dos Amigos da Dorna Meca e da FGCMF.

Normas: ghana quen primeiro cheghe sen faser ranhucadas!

A arranchar as dornas!

Saídas de iniciación á navegación tradicional

No inicio do verán avisamos polas redes sociais que, un ano máis, iriamos facer saídas de iniciación á navegación tradicional.

Cartaz para promover as saídas de iniciación á navegación tradicional.

O obxectivo destas saídas é, por un lado, dar a conhecer o patrimonio marítimo galego e difundir a navegación tradicional, ensinando non só a navegar á vela, mais tamén recuperando o léxico marinheiro propio desta actividade. Por outro lado, aproveitamos as saídas para enriquecer tanto a base social do noso colectivo como o tecido cultural desta vila. Cantas máis persoas interesadas e involucradas na recuperación da navegación tradicional, máis fácil será coidar dos nosos barcos, ver máis velas de relinga pola ría, e recuperar embarcacións con pouco ou ningún uso. E, por suposto, pasalo ben!

 

Veleando en dorna Meca Pola ría de Arousa.

Publicado por Xan Caneda Gonzalez em Quarta-feira, 26 de Julho de 2017

Ler mais