A Fuxe, vencedora da XX Regata dos Faros

O pasado sábado, como anunciamos por aquí, celebrouse en aguas mecas a XX edición da Regata dos Faros de dornas á vela.

Nos días anteriores ao evento, prevíase algo de vento fresco, polo que a organización estivo a debater intensamente o percorrido da regata e posíbeis alternativas. Finalmente, decidiuse unha ruta similar á de pasadas edicións, con saída do Porto d’Ogrove, unha virada na baliza do Arido, outra por dentro do faro do Sinás e outra perto da Cabreira (e así, dúas voltas).

Todo baixo control!

Xuntámonos no porto un total de 26 dornas prontas para a regata, tanto d’Ogrove como de Cambados, da Ilha de Arousa, de Ribeira ou de Portonovo. Moitas xa veteranas, outras máis novinhas, e outras clásicas tripuladas por patronas e patróns en formación (podréns de toda a vida). Como había un pouco nortinho, unhas dornas tomaron un ris, outras medio, e outras saíron con toda a vela.

Rumo Arido!

A saída foi moi bonita: xa desde o inicio pudemos ver varias estratexias para chegar ao Arido: quen tentou ir nun largo rumo á baliza, quen despois de varios bordos acabou en Cambados, quen non sabía a que dorna seguir pola popa…

Por alí ou por alá?

Do que non se lembraron alghúns patróns é de que a maré estaba case toda a baixa, polo que aproveitaron para remenxer a area e mover birbirichos e cadelas nos lombos da Toxa e do Sarrido.

Xa desde ben cedo, a Fuxe, dos Parada, destacouse en cabeza, seguida de perto pola Xarandeira.

A Fuxe e a Xarandeira na baliza do Arido.

Outras dornas como a Nécora ou a Jalerna non andaban lonxe. Un pouquinho mais atrás competían a Marijuana, a Triñana, a Bichasa e a Bazarra, e así en diferentes grupos de dornas.

A Bazarra, a Triñana e a Marijuana.

Na segunda volta, e con algunha avaría polo medio, a clasificación xa ía tomando forma.

A Bichasa comezando a segunda volta!

O final foi moi disputado entre a Fuxe e a Xarandeira, quen ficou en segunda posición por moi pouquinho.

Non vos dixemos que a chegada foi xustinha?

A cousa acabou así:

  1. Fuxe
  2. Xarandeira
  3. Nécora
  4. Jalerna
  5. Bandalha
  6. Marijuana
  7. Triñana
  8. Bichasa
  9. Bazarra
  10. Zenaida
  11. Noelia
  12. Montañesa
  13. Maristela
  14. Rosalía
  15. Toxiña
  16. Lara Doce
  17. Calloa
  18. Cormorán de Ons
  19. Moura

Como dixemos, houbo algunhas dornas ás que non lhe apeteceu acabar:

  • Ortelinda
  • Beliña
  • Nerea
  • Maraxe
  • Bicoca
  • Fanequeira
  • Selosa

Acabada a reghata, e para non perder os bos costumes, houbo unha boa cuchipanda, a entrega de trofeus e reghalinhos ás tripulacións, e boa festa!

Todos querían saudar os campeóns!

Enfín, que tivemos unha regata moi bonita, con boa participación e con melhor ambiente! Parabéns aos vencedores e obrigados aos participantes e colaboradores!

Deixa unha resposta

O teu enderezo electrónico non se publicará Os campos obrigatorios están marcados con *

*