Publicado o Setembro 12, 2017
Nin o furacán pudo coa Marijuana en Miami
Nin o furacán nin o resto das 15 dornas que se xuntaron este sábado na praia do Espinho de San Vicente puderon bater a Marijuana, que ganha novamente a “Regata de Dornas á Vela Camping Miami Playa“.
Antes de comezar, co bandulho aínda cheo xa viamos como o ventinho, do noroeste, non deixa de subir, así que patróns, patroas e outra tripulación ía botando as dornas ao mar mentres decidía se colher ou non algún ris…
Aínda non chegara o furacán á costa e, infelizmente, xa tivemos a primeira vítima 🙁 : un dos tripulantes da Noelia levou un pequeno susto ao baixar a dorna no varadoiro. Rapidamente se lhe aplicaron os primeiros auxilios antes de acudir a un profisional. Boa recuperación, camarada!
Xa coas dornas no mar, o percorrido foi o habitual nesta regata. Saída do porto nunha empopada até aos Raeiros, volta en bolina até á baliza verde de entrada no porto, e virada novamente na zona da saída.
A vixente campeoa, a Marijuana, despuntou xa desde o inicio. Despois de dar a primeira virada só a Triñana e a Mimela a vían de cerca.
Canto máis se afastaban as dornas de terra, maior era o tamanho das ondas, polo que algunhas tripulacións comezaban a sofrer un pouquinho antes de virar para o porto.
Como o vento continuaba a subir, e o mar por fóra non era pouco, algunhas dornas preferiron baixar vela e vir para terra…
e outras tiveron algún probleminha que as fixo ir a pique 🙁
No fin da segunda volta a linha de meta colocouse na entrada da praia, polo que os metros finais foron máis espectaculares! Ao acabar a regata, a cousa acabou así:
- Marijuana
- Triñana
- Nova Froíña
- Mimela
- Lara Doce
- Cormorán de Ons
- Rosalía
- Fanequeira
- Calloa
- Ortelinda
- Maraxe
- Moura
- Montañesa
- Ruliña Dos
- Noelia
Só 8 dornas fixeron o percorrido completo, 5 abandonaron, a Noelia non chegou a comezar, e a Ruliña Dos… digamos que fixo un itinerario alternativo 😀 😀 😀
Como sempre, a xente do Camping Miami Playa portouse fantasticamente con tod@s nós, e alí tivemos unha boa festa de fin de regata con entrega de premios, comida e bebida a fartar!
Obrigad@s ao Camping Miami, ao resto de patrocinadores, e ás tripulacións e asociacións asistentes! Xentes d’Ogrove, da Ilha, de Ribeira, de Cambados, de Vigo…!