Publicado o Setembro 13, 2020
Até sempre, Pate!
Hoxe é un día triste para os Amigos da Dorna Meca, para o pobo d’Ogrove e para o mundo das embarcacións tradicionais. Fóisenos o noso querido Rafa.
Alá onde esteas, bos ventos Rafa, e que a terra che sexa leve! 😢
Publicado o Outubro 4, 2019
Regatas do Marisco 2019
Volta a Festa do Marisco, e voltan as regatas de dornas!
Primeiro: este sábado día 5 de outubro, con saída do Porto d’Ogrove ás 16h, Regata do Marisco de Dornas á Vela.
Segundo: o sábado 12 de outubro, ás 12h (ás dose da manhán, si!) Desafío a Remos!
A desfrutar que van acabando as regatas deste ano!
Publicado o Setembro 23, 2019
XII Regata Porto Meloxo
Este sábado día 28 de setembro, coincidindo (pouco máis ou menos) coa marea chea, vai celebrarse a XII Regata Porto Meloxo de Dornas á Vela!
Como é tradición, a saída será desde a praia do Porto ás 16h (catro da tarde), coa vela abaixo e os temóns a bordo!
Agradecemos un ano máis ao Café Bar O Porto, á Taberna Meloxeira, a Culturmar e ao Concelho d’Ogrove pola colaboración!
Publicado o Setembro 11, 2019
VII Regata Camping Miami
Outro ano máis chega o mes de setembro e continúan as reghatas de dornas á vela. Esta vez (unha vez máis), a navegar fóra da ría polo Mar da Lanzada:
Dorneir@s, ide quitando o verdelho e o arneirón e arranchade as dornas: este sábado día 14 de setembro, con saída puntual ás 16h00 desde a praia do Espinho, VII Premio-Regata Camping Miami de dornas á vela!
Boa proa!
Publicado o Xullo 2, 2019
A dorna Fuxe ganha a XXII Regata dos Faros!
Estabades máis que avisad@s! Este sábado 29 de xuño celebramos a XXII edición da Regata dos Faros de dornas á vela.
Un total de 23 dornas d’Ogrove, da Ilha, de Cambados e de Vigo xuntámonos nunha tarde que, até á hora da saída, parecía calminha
A diferenza doutras edicións, este ano deuse a saída desde o pantalán/dique de Peralto. Como outras veces, a primeira virada sería na baliza do Arido e a segunda no Faro Pragheiro. Despois, as dornas virarían nas primeiras bateas de Meloxo para vir acabar a regata no espighón (melhor sen tocalo 😉 ).
O vento e o mar estiveron calminhos toda a manhá, mais as previsións xa apuntaban que a reghata non ía ser fácil. Aí ás 16h comezou a soprar do noroeste, así que o primeiro largho foi directo ao Arido…
Á medida que se foron esquivando as bateas, a baliza víase máis clara, e o vento entraba con algo máis de forza.
Ao iren as dornas pasando a baliza, ía tamén o vento subindo. Algúns barcos continuaron proa a norte, e outros preferiron virar mais cedo rumo ao Sinás…
No interior da Ría, o mar ía colhendo forza, e o vento era ía levantando máis, con refachos de máis de 15 nós.
Con este tempo, comezaron as queixas: alghunha vergha partida, varas polo mar abaixo, trasluchadas sen querelas, e alghún “vamos p’a terra que que c*r#lh@ vamos fazer alá”… 😉
Apesar de todo, non houbo danos persoais, e grazas á colaboración dos voluntarios (obrigados especialmente a Celes e ao noso Carcamán) non houbo problemas serios.
Das 23 dornas que comezaron, só 9 acabaron a reghata (á vela chegaron 10, mais a 10ª tomouno con calma e o xurado cansou de esperar…).
Ao chegar a terra, como é habitual, non faltou de comer nin de beber, e ao acabar, entrega de premios. O conto acabou máis ou menos así:
- Fuxe
- Forza R
- Xarandeira
- Lixeiriña
- Rosalía
- Toxiña
- Cormorán de Ons
- Montañesa
- Madorniña
- Funqueira
- Roxiña
- Bandalha
- Fungona
- Noelia
- Lara Doce
- Triñana
- Jalerna
- Marijuana
- Nova Froiña
- Chunga
- Julicheira
- Pancha
- Oliña
Un ano máis, a Fuxe vence a Regata do Faros! Parabéns a Manolo e a Brais Parada
Non nos vamos sen agradecer, máis unha vez, a todas as persoas que colaboraron preparando a regata, a comida, limpando o local, axudando desde os barcos de apoio, sacando fotografías (Estudio Interfilm e Lino Prieto), etc., e por suposto a todos os participantes!
Aquí podedes ver unha galería de fotos da regata, e un vídeo aéreo cortesía de Recinet Salnés!
